VIII. No. 21. PARAMASASTRA JAWI ( BAB : TÊMBUNG KRIYA )

 Paramasastra Jawi 21 :

I. Têmbung Kriya :

--- Kang diarani têmbung Kriya iku sarupaning têmbung kang mratélakaké solah-bawa utawa tumandang gawé.

Ana ing ukara, têmbung kriya iku kang mratélakaké wasésa.

~~ Tuladha : 

      1. Sarimin " nangis "

      2. Sunarti " turu "

      3. Bagya " mênthung " asu.

      4. Surti " ndondomi " klambi.

--- Tuladha kasêbut kang ana tandhané "..." kayata : " nangis " ; " turu " ; " mênthung " ; lan " ndodomi " ing ukara iku, minangka wasésané sarta wujud têmbung kriya.

--- Mênawa dipêrmanakaké, têmbung kriya ing ukara mau ana bédané sathithik.

Yaiku ing ukara No. 1 lan No. 2 awujud têmbung kriya kang tanpa lésan.

--- Sênajan tanpa lésan, wong sing maca utawa krungu mêsthi wis ngêrti maksudé.

--- Déné ing ukara No. 3 lan No. 4 awujud têmbung kriya kang mawa lésan.

Manawa lésané diilangi, wong sing maca utawa sing krungu durung ngêrti maksudé, mêsthi isih takon : mênthung apa ? ; ndondomi apa ?

--- Dadi têmbung kriya sing kaya ngono mau ( No. 3 lan No. 4 ) kudu ditambahi lésan amrih cêtha sing dadi maksudé utawa karêpé.

   TÊMBUNG KRIYA MANUT DHAPURÉ :

--- Miturut dhapuré têmbung kriya iku kapérang dadi rong golongan yaiku :

         1. TÊMBUNG KRIYA LINGGA.

         2. TÊMBUNG KRIYA OWAH-OWAHAN.

                     --- wjg ---

----> ana candhaké : 

       BAB :TÊMBUNG KRIYA LINGGA  

       VIII. 22.