Unggah-Ungguhing Basa 3 :
--- Basa Ngoko Andhap iku kabédakaké dadi rong golongan yaiku :
1. Ngoko Antya Basa.
2. Ngoko Andhap Basa Antya.
--- Wondéné sing kêrêp kanggo yaiku Ngoko Antya Basa.
--- Déné Ngoko Andhap Basa Antya wis ora lumrah kanggo, malah kêna diarani wis mati babar pisan.
Ya mung minangka sêsurupan baé, mêngko bakal katêrangaké ringkêsané baé.
Katrangan Bab Pênganggoné :
1. Kanggo gunêm karo sapa baé kang
sêsrawungané wis rakêt bangêt,
nanging isih padha déné ajèn-ingajènan.
2. Kanggo gunêm wong wadon marang
kakungé ( bojoné ).
--- Titikané Basa Ngoko Andhap Antya Basa yaiku :
1. Têmbung-têmbungé ngoko kacampuran
têmbung krama inggil, tumrap wong
kang diajak gunêm, mratélakaké
anggoné ngajèni ( ngrêgani ).
2. Têmbung-têmbung kayata :
| Aku | panggah (ajêg ora owah) |
| Kowé | tumrap wong kang kaprênah tuwa, disalini panjênêngan |
| Kowé | tumrap kang kapêrnah ênom, disalini sliramu utawa kêngslira |
| Atêr-atêr dak | Kula |
| Atêr-atêr ko | panggah (ajêg ora owah) |
| Atêr-atêr di | panggah (ajêg ora owah) |
| Panambang é | panggah (ajêg ora owah) |
| Panambang aké | panggah (ajêg ora owah) |
| Panambang ku | panggah (ajêg ora owah) |
| Panambang mu | panggah (ajêg ora owah) |
--- Tuladha :
1. Mau bêngi sliramu apa tindak kumpulan
RT ?
2. Mas Prapta, panjênêngan apa wis
mundhut bagéané ?
3. Pak, dak aturi dhahar sik, kaé wis dak
tata.
4. Kuwi agêmané kok pating clonèh, gupak
apa ta Pak ?
5. Nèk panjênêngan arêp mriksani, aku di
dhawuhi ndhèrèk ya gêlêm.
--- Titikane Basa Ngoko Andhap Basa
Antya yaiku :
1. Têmbung-têmbungé ngoko kacampuran
têmbung krama lan krama inggil.
2. Atêr-atêr ; dak, ko, di, panggah
( ora owah ).
3. Panambang ; ku, mu, é, aké, panggah
( ora owah ).
4. Têmbung kowé ; disalini
sliramu/kêngslira.
--- Tuladha :
1. Jaré saèstu mriksani, saiki lagi tindak
ngêndi ?
2. Gèk lampahé baé apa ya Mas, kok
gamêlané sadalu natas ngungkung baé.
3. Aku dhéwé ya nampa ulêman, ning ora
mangkat, jalaran ora ana sing têngga
griya.
--- wjg ---
---> ana candhaké : BASA MADYA NGOKO
III. 4.BASA
